Abu Dhabi ka dhamaka ab bina driver chalne wali gadiyon par hogi full control

Abu Dhabi ne autonomous vehicles yaani bina driver ke chalne wali gadiyon ki duniya mein ek bahut bada kadam uthaya hai. Integrated Transport Centre jise Abu Dhabi Mobility bhi kaha jata hai, usne ek naya Central Control Room shuru kiya hai. Yeh control room puri tarah se bina driver wali gadiyon ki nigrani aur unhe regulate karne ke liye banaya gaya hai. Is nayi suvidha ka uddeshya sadkon par chalne wali in smart gadiyon ki suraksha aur unki raftaar ko behtar banana hai.

Is naye control room mein AViTOMS naam ka ek khaas system lagaya gaya hai. Is system ki madad se gadi kahan hai, kitni speed par chal rahi hai aur uska route kya hai, iski jankari real-time mein milti rahegi. Agar koi emergency aati hai, toh yeh system turant authorities ko alert bhej dega taaki sahi samay par madad mil sake. Iske alawa, jo companiyan autonomous gadiyan chalana chahti hain, unhe permit dene aur unke route tay karne ka kaam bhi yahi se hoga.

Abu Dhabi mein bina driver wali gadiyon ka craze tezi se badh raha hai. Sirf 2026 ke pehle chhah mahino mein hi yahan 31,075 trips in gadiyon ke zariye puri ki gayi hain. Dhabi ke Integrated Transport Centre ke Acting Director General Dr. Abdulla Hamad AlGhfeli ka kehna hai ki yeh control room smart mobility ki disha mein ek bada badlav hai.

Isse pehle September 2025 mein Abu Dhabi ne self-driving delivery vehicles ke liye alag se license plate jari ki thi, jinka trial Masdar City mein hua tha. UAE ka lakshya hai ki 2040 tak unki kul trips ka 25% hissa smart transport solutions yaani aisi hi technology wali gadiyon se ho. Iske liye June 2024 mein naya Federal Traffic Law bhi pass kiya gaya tha, jisme bina driver wali gadiyon ko bhi traffic rules ke daayre mein shamil kiya gaya hai.